港超聯 理文主場第一擊強攻港會
2024年09月21日 21:15
東網電視
更多新聞短片
港超聯：理文 vs 港會
【東網按次收費直播】
「中銀人壽香港超級聯賽」周日（22日）另一場賽事，理文會假將軍澳運動場迎戰港會，「黃黑軍團」各項賽事錄得兩連敗，今場爭勝決心毋庸置疑，面對有主力缺陣的港會，隨時大開殺戒！（on.cc東網周日下午4時按次收費直播）
理文此前兩戰，分別在聯賽及「亞冠盃2」失利，主教練曾昭達坦言球隊近期表現未如理想，因此是役會踢得更主動，務求盡快反彈：「球隊開季之後，臨場發揮係有不足，我哋一直把握時間調整戰術，今場肯定要更加有侵略性，注重整體配合，希望踢番出應有水準。」此外，縱使球隊近兩戰全敗，但「達sir」強調球隊爭勝心及鬥志，不會有所動搖：「明白球迷對我哋嘅期望，唯有盡量做好畀佢哋睇，去令隊波有改善，畀大家睇到理文嗰份決心。」另一方面，黃威及馬天尼斯有傷在身，上陣成疑，但「達Sir」指球隊兵源充足，問題不大。
「黃黑軍團」本周賽程頻密，胡晉銘形容今場非贏不可，有信心可以挽回頹勢，取得勝仗：「球隊已經連輸兩場，要喺呢幾日重整旗鼓，依家所有人目標一致，希望踢場爭氣波攞足3分。」
至於港會就有陳浩嘉、曾俊軒、韋俊軒及林澔希，因代表港隊到卡塔爾出戰「U20亞洲盃」外圍賽，未能候命，主教練谷卓斯坦言對調動構成影響，但強調一切以代表隊為重：「呢幾個年輕人好幫得手，冇佢哋喺度，對排陣實有影響，但代表港隊係至高無上嘅榮耀，希望其他球員準備得好啲，頂咗今場先。」谷卓斯又提到，雖然理文近況未如理想，但實力依然強大，呼籲球員奮力一戰：「理文咁多攻擊球員，級數唔使懷疑，大家要減少失誤，唔好畀咁多機會對手。」
前鋒里奧就預計「黃黑軍團」周中在「亞冠盃2」落敗後，是役定必全力爭勝，為球隊帶來極大考驗：「理文今鋪一定去到盡，而且將軍澳場又咁大，令佢哋有好多空間進攻，所以大家要保持緊密，守好每一球，希望畀到驚喜大家。」
【兩隊預計正選陣容】
理文
門將：28.陳嘉豪
後衞：26.黃俊皓 19.金旻奎 13.李毅凱 4.立花稜也
中場：7.保利臣 6.胡晉銘 14.夏馬特
前鋒：8.艾華頓 9.安尼亞 20.保連奴
港會
門將：1.費查
後衞：6.李俊諺 26.羅素 4.唐道碧 18.積施利
中場：11.何家智 5.峇夏比 8.麥美倫 13.加斯特夫
前鋒：7.陳灝 9.里奧