曼聯棄將又送助攻　車路士挫韋斯咸

英超周六(21日)早場，車路士作客3比0大炒韋斯咸，聯賽2連勝。尼高拉斯積遜今場唔再敗家，開賽早段已經起孖，下半場再助攻高爾彭馬整多粒，至於曼聯棄將查頓辛祖今場送助攻入第一球，連續兩場交出助攻，大打爭氣波，以表現證明坦哈格唔識寶。

呢場「倫敦打吡」戰況一面倒，車路士開賽4分就開紀錄，查頓辛祖送靚直線，尼高拉斯積遜射過埋門將艾路拿大細龍門入網，領先1比0，入波後高爾彭馬又有機會，可惜佢射門貼柱出界，18分鐘尼高拉斯積遜又單刀建功，今次送助攻係摩西斯卡些度，韋斯咸其後古達斯一度送球入網，但越咗位食詐胡，車路士半場領先兩球。

易邊後車路士一次快攻，尼高拉斯積遜引開對方後衞，畀走空位嘅高爾彭馬射成3比0，大比數落後嘅韋斯咸變陣，換入米查利安東尼奧、卡路士蘇拿同阿素迪沙斯搏殺，不過車路士後備席大把子彈，柏度尼圖、祖奧菲歷斯、尼干古等人落場，仍然控制大局，最終車路士贏3比0完場。