有麝自然香！4大豪門關注格連活特

格連活特今季由曼聯轉投馬賽，4場聯賽入咗5粒，據報佢嘅表現已經引起歐洲4大頂級豪門關注，曼聯亦樂於推動格連活特加盟大球會，因為如果格連活特有大額轉會，曼聯都有錢分。

多間傳媒報道，歐洲4大頂級豪門皇馬、巴塞、拜仁同PSG，都對格連活特今季演出表示關注，其實早在格連活特加盟馬賽前，巴塞曾在今夏提出斟介，不過未能成事，今季格連活特展示頂級前鋒實力，而且只有22歲，自然吸引到豪門注視。

格連活特在曼聯出道，身價曾經高達5,000萬歐元，當時有分析指其身價有望躋身1億歐元等級，不過後來發生家暴及性侵等事件，遭曼聯即時雪藏，其足球事業一落千丈，不過格連活特始終是高質素前鋒，上季外借基達菲已交出好表現，今季正式轉投馬賽已經回復高水平，將一步一步重回巔峰。

馬賽今夏簽入格連活特，轉會費3,100萬歐元，簽約5年，其身價仍然處於極低水平，能夠低價買入一位有機會身價破億射手，難怪各大豪門都心動。