奧拿拿連環神救勁過拉耶：唔係好重要啫！

曼聯作客0比0打和水晶宮，連續3場比賽保持不失球，今次「清白身」最大功臣係門將奧拿拿，佢喺下半場曾經作出超精彩連環撲救，獲評「更勝」日前阿仙奴門將大衞拉耶喺歐聯嘅連救。不過奧拿拿賽後直指佢嘅撲救「唔係咁重要」，因為曼聯贏唔到波。

曼聯上半場控制戰局，但水晶宮下半場拎番唔少攻勢，65分鐘尼基迪亞推到禁區頂狂抽，奧拿拿飛身撲出不遠，伊斯美拿沙亞衝前補射，奧拿拿極快反應彈起再將射門撲出底線。為《天空電視》評述嘅阿倫史密夫表示：「大家都談論拉耶喺歐聯嘅連環撲救，我覺得奧拿拿呢次更加勁，翻身救嗰球係難以置信！」

呢位喀麥隆門將賽後就好謙虛，佢話：「唔係好重要啫！因為我哋都贏唔到，曼聯係間咁偉大嘅球會，去到邊都會以贏波為目標。保持不失當然開心，但我覺得我哋好過對手，當你值得贏波而贏波到，結果係會失望。」