祖雲達斯悶和拿玻里　創一項尷尬紀錄

周日(22日)凌晨意甲大戰，祖雲達斯主場同拿玻里打和0比0，連續3場聯賽悶和，最諷刺係祖記成為今季歐洲5大聯賽唯一仍未失波球隊，重現昔日鋼鐵防線，但卻連接失分，處境非常尷尬。

拿玻里反客為主，創造唔少具威脅攻門，包括麥湯米尼遠射，保列坦奴主射罰球，都被祖記門將迪基哥里奧飛身撲出。換邊之後，保列坦奴右路個人突破，扣入中路起腳高出，祖雲達斯最有威脅1次攻門，係中場古普美拿斯喺禁區內起腳射高，最終踢成0比0。

祖雲達斯今季由莫達接手執教，首2場聯賽係威係勢都大勝3球，但之後無以為繼，對羅馬及安玻里都互交白卷，即使上場歐聯以3比1擊敗燕豪芬，但今場意甲又打回原形，換言之已連續3場聯賽踢成0比0。

賽後拿玻里教練干地嘲諷莫達戰術太保守：「莫達部署令人失望，我哋門將連手套都冇污漬。」根據統計數據，祖雲達斯今場9次射門只有1次中目標，莫達真係要諗計幫球員重拾射門鞋。