屠夫收山腳！馬天尼斯走甩紅牌要還神

曼聯中堅利辛度馬天尼斯外號「屠夫」，身材唔高大但踢法非常狠辣，周日(22日)對水晶宮呢位阿根廷國腳就「勇過頭」，竟然跳高用雙腳飛鏟對手，好在呢招「屠夫收山腳」踢唔中人，最後只係收一張黃牌真係要還神！

下半場一次激烈爭搶，利辛度馬天尼斯跳起用雙腳飛鏟，雖然佢踩中個波，但「收山腳」嘅危險動作仍被吹罰，不過球證網開一面只出黃牌，VAR翻查後亦同意判決，曼聯成功走甩紅牌。熱刺名將奧哈拉喺電視台表示：「恐怖嘅飛鏟，我從未見過職業球員會咁樣搶波，走甩紅牌真係行運。」英超之後亦喺社交網解釋：「球證向馬天尼斯出示黃牌，VAR曾檢視有冇需要紅牌，最後同意球證決定，馬天尼斯作出一次魯莽攔截，但冇掂到鐮田大地。」

前曼聯中堅菲爾鍾斯亦呼籲利辛度馬天尼斯要收歛一下：「佢係有啲運，嗰個情況唔需要雙腳飛鏟，如果佢稍微掂到下對手，張牌嘅顏色就唔同。利辛度馬天尼斯嘅踢法一向都係咁勇悍，但佢要識得控制，呢一腳唔會係紅牌，但佢之後真係要好小心。」