謝德謙：英超榜首戰旗鼓相當

英超爭標大戰提前上演，曼城主場激戰阿仙奴，雖然只係開季階段，不過兩隊現時排喺前列位置，榜首曼城以兩分領先次席嘅阿仙奴，兩隊都有主將未能上陣，但相信戰況同樣激烈。

季初四連勝嘅曼城，上周中歐聯與國際米蘭互交白卷，隊長奇雲迪布尼因傷下半場被調走，今仗上陣成疑。前鋒艾寧夏蘭特只要今場能取得入球，便達成效力「藍月亮」入100球里程碑，今場大戰爭標對手必定顯得分外落力。主帥哥迪奥拿今場會倚重根度簡、菲爾科頓及謝利美杜古，務求以控球在腳擊敗對手。

「兵工廠」上周中歐聯對阿特蘭大同樣互交白卷，而且舟車勞頓去到意大利作客，對今場發揮必定有所影響。預計主帥阿迪達會採用防守反擊戰術。由於隊長馬田奧迪加特足踝傷勢嚴重未能上陣，只能倚重布卡約沙卡及加比爾馬天尼利等快翼打反擊，估計只能主守為先。今場比賽大有機會主場嘅「藍月亮」控制大部分形勢，或可憑較佳的把握力最終小勝對手。