狼隊中堅恐怖受傷　膝頭扭曲有排抖

狼隊今季英超有個惡夢開局，5輪聯賽只得1分排包尾，周六(21日)作客1比3輸畀阿士東維拉一役，更有中堅尤辛莫斯基拉嚴重受傷，佢嘅左腳膝頭被打橫撞到變型，領隊加利奧尼爾直指呢位哥倫比亞國腳要「缺席好長時間」。

尤辛莫斯基拉今季場場正選，今場對維拉踢到82分鐘仲係1比1，佢同摩根羅渣士爭波腳撞腳，尤辛莫斯基拉左腳膝頭受壓下明顯扭曲，即時痛苦倒地，並要用擔架抬離球場。狼隊喺佢傷出後連失2球，領先下反輸1比3。

據報尤辛莫斯基拉好大機會傷及膝部韌帶，狼隊領隊加利奧尼爾表示：「我未知傷勢係點，但睇落情況好差，佢受傷個時間對球隊係好大打擊，依家佢仲要缺席一段好長時間，對狼隊亦係非常巨大嘅打擊。」