科芬拿膝傷復發？馬利斯卡派定心丸

車路士近期成績好轉，周六(21日)英超作客3比0大勝韋斯咸，不過完場前出現驚嚇一幕，下半場早段被換走嘅中堅韋斯利科芬拿，左膝被厚厚包紮，令人擔心佢膝部舊患復發，幸好領隊馬利斯卡賽後證實佢冇乜大礙。

23歲嘅韋斯利科芬拿2年前加盟車路士後，多次因為各種膝傷而長抖，今季佢5場聯賽全部正選，但今仗踢到57分鐘就被換走，完場後佢返入球場向球迷致謝，左膝位置就被包紮住。

馬利斯卡表示：「冇事、佢冇乜大嘅問題，換人只係想保護佢，下半場韋斯咸將古達斯調去佢(科芬拿)嗰邊，要科芬拿應該係有啲冒險，換佢並唔係因為傷患問題。」韋斯利科芬拿上季全季養傷，馬利斯卡打算「錫住用」，甚至冇將佢放入歐協聯嘅參賽名單，畀佢更多時間休息。