伊美路維大翻身　阿仙奴走寶

富咸上場英超以3比1擊敗紐卡素，打破對方今季不敗之身，中場伊美路維射入1球，呢位24歲英格蘭國腳今季由阿仙奴轉投富咸後，踢5場英超已入2球及1次助攻，成功大翻身。

伊美路維出身於阿仙奴青訓系統，18歲已為兵工廠一隊上陣，當中2021/22年球季37次披甲入11球，一度被視為球隊未來10年中場大腦。不過，好景不常，伊美路維受傷患打擊，加上阿仙奴中場人才濟濟，佢傷愈後失去正選，上季僅上陣19次，決定今夏轉投富咸，轉會費達3,400萬鎊，成為阿仙奴史上最高價賣走嘅球員。

伊美路維大踢爭氣波，對李斯特城一役，射入1球，協助富咸贏2比1，對韋斯咸，貢獻1次助攻，加上今場射入紐卡素大門，換言之，佢近4次英超上陣創造3個入波，證明自己物有所值。

最諷刺係阿仙奴出售伊美路維後，收購皇家蘇斯達中場米基爾馬連奴，但呢位西班牙國腳未上陣已受傷長抖，兵工廠一賣一買決定大錯特錯。