巴塞大勝笑唔出　達史特根重傷或抖9個月

周一(23日)凌晨西甲，巴塞隆拿作客5比1大破維拉利爾，開季6戰全勝穩坐榜首位置，不過教練費歷克就笑唔出，事關德國門神達史特根喺比賽中嚴重受傷，初步檢查認為係右膝肌腱斷裂，面臨長達9個月嘅養傷期，今季可能提早收咧。

巴塞喺上周中歐聯輸波，今場迅即重整旗鼓，憑羅拔利雲度夫斯基梅開二度早早領先2球，維拉利爾38分鐘由艾約斯佩雷斯追番1粒。完半場前出現恐怖一幕，達史特根勇救單刀後，喺角球接波嗰陣落地扭傷右膝，佢不斷痛苦大叫，並要由擔架抬離場。巴塞未受影響，下半場再有柏保路托尼、拉芬夏比洛尼同方治各建一功，大勝5比1完場。

據西班牙《阿斯報》報道，軍醫初步認為達史特根右膝髕骨肌腱斷裂，如果詳細檢查證實判斷正確，呢位32歲門將預計要長抖9個月。費歷克賽後表示：「睇落好嚴重，佢感受得到，大家喺球場上都見到。」被問到達史特根係咪提早收咧，費歷克就話：「我唔鍾意呢條問題，場波啱啱先完，我哋對發生嘅事好難過，達史特根係巴塞隊長，我仲未有機會同佢對話。」