【有片】夏蘭特里程碑之戰失控　瘋狂撩交打

曼城喺主場2比2逼和阿仙奴，挪威前鋒艾寧夏蘭特延續巔峰狀應，今場先開紀錄入波，係佢曼城生涯第100個入球。不過呢場里程碑之戰，最後搞到失控收場，夏蘭特被影到喺曼城絕地追和後，用個波掟加比爾馬加希斯個頭，隨後再去辣着阿仙奴球員引發衝突，火藥味十足。

夏蘭特上半場攻入今季第10個英超入波，亦係佢105次為曼城上陣嘅第100球，威力驚人。下半場隨住阿仙奴踢少個「泊大巴」，夏蘭特喺密集防線內反而「隱形」，愈踢愈躁嘅佢尾段失控，當史東斯為曼城入波後，夏蘭特喺龍門執波並唔係諗住即刻重開，而係將個波掟向馬加希斯後腦「發洩」。

夏蘭特撩交打片段：https://twitter.com/i/status/1837920235057500526　

比賽最後重開，「上頭」嘅夏蘭特即向前狂衝撞跌湯馬士柏迪，引發雙方球員圍埋推撞，夏蘭特對首次上陣嘅阿仙奴17歲小將史基利大叫：「你係邊X個？」又對加比爾捷西斯咆吼：「死X開！」好在最終雙方都沉得住氣，冇出現更嚴重事故。