失分事小！洛迪膝傷先係曼城最大憂慮

英超「天王山之戰」夠晒激烈，曼城喺主場圍攻阿仙奴只能踢成2比2平手，連續4次交鋒都贏唔到「兵工廠」，不過相比起今場失2分，西班牙中場洛迪卡斯簡迪上半場傷出更令人憂慮，據報佢嘅傷患有機會係前十字韌帶問題，如果屬實將會長時間缺陣。

洛迪夏天踢完歐國盃後，曼城季初畀佢更多時間叉電，今仗係佢今季聯賽首次正選，點知只係踢咗18分鐘，佢喺一次角球攻勢走向前柱急停，突然抱住右腳膝頭痛楚倒地，軍醫治療期間佢一度眼泛淚光，最終提早離場。曼城領隊哥迪奧拿賽後表示：「洛迪係好強壯嘅球員，如果佢要離場，一定係覺得有唔妥，否則佢會繼續比賽。」

洛迪右膝受傷片段：https://twitter.com/i/status/1837889315344367723　

有醫學專家分析，洛迪今次傷勢情況唔樂觀，「最好情況」係半月板受傷，如果傷及前十字韌帶，休養期會係半年以上。據《每日郵報》報道，曼城喺洛迪在陣下，有74%勝率同11%輸波率，但喺洛迪缺陣下，勝率跌到64%，而輸波率就增加至24%。