阿仙奴角球戰術有料到！馬加希斯成大賽殺手

阿仙奴喺英超作客曼城打和2比2，拿手好戲「角球戰術」又得米，巴西中堅加比爾馬加希斯繼上輪作客熱刺一箭定江山後，今場又接應角球頂爆曼城，再一次顯示「大賽殺手」嘅實力。

由上季開始至今，阿仙奴靠死球拎到24個入球冠絕英超，今場對曼城嘅角球戰術亦好有心思，安排加比爾馬天尼斯企喺曼城門將艾達臣摩拉斯身後，而且背向對方「站樁」，純粹塞住艾達臣出迎路線，令馬加希斯可以「飛將軍」式衝頂破網。由於馬天尼斯成個過程齋企全無動作，VAR檢查後亦發現冇任何犯規行為，令入球得以成立；事實上喺呢個入波之前冇耐，阿仙奴已經有一次完全一樣嘅角球戰術，只係馬加希斯頂高咗，可惜曼城未能及時修正。

統計顯示，馬加希斯4年前加盟阿仙奴後，喺英超已有16個入球，當中14球係嚟自角球，角球入波比率(88%)係英超史上最高(只計入10球以上球員)。值得留意係，馬加希斯喺大賽經常有波入，包括前季作客車路士(贏1比0)、上季作客利物浦(和1比1)、今季作客熱刺(贏1比0)同今場作客曼城(和2比2)。