為踢國家隊　遠藤航將被迫離開利物浦

日本隊長遠藤航在高普年代頗受重用，係利物浦中場核心之一，但現在利物浦由施洛執教，遠藤航已被打入冷宮，據報遠藤航為自己前途着想，好大機會明年1月離隊。

遠藤航今季僅在聯賽對賓福特及歐聯對AC米蘭後備上陣，但都係尾段入替，比賽時間僅1分鐘就完場，即係幾乎冇踢過，分析指遠藤航不在施洛計劃之內，留在紅軍只會浪費彼此時間。

早前國際賽檔期，遠藤航獲徵召踢世界盃外圍賽，更取得入球，證明狀態冇走樣，不過有分析指，如果佢長坐冷板，勢必影響狀態同表現，長遠計將會影響2026世界盃入選機會。

有球員經紀指出，許多國家隊只會徵召在所屬球會有落場比賽球員，否則不會被徵召，身價亦會受影響，球員唯一選擇就是轉會，出售或外借均可。