哥帥焗變陣　兩位後衞成洛迪替身

曼城中場洛迪卡斯簡迪面臨缺陣今季餘下賽事，領隊哥迪奧拿需要變陣，填補呢位防中嘅位置，根據英國傳媒分析，中堅史東斯、右閘歷高利維斯有可能轉型，擔任防守中場。

曼城大部分中場屬於進攻型球員，防中人腳不足，哥迪奧拿近年曾經多次將中堅史東斯推前客串防中，效果唔錯。至於洛迪卡斯簡迪等主力缺陣今季季初賽事期間，哥帥安排右後衞歷高利維斯踢防守中場，呢位19歲小將已經熟悉新角色，亦係頂替洛迪卡斯簡迪嘅唔錯人選。

不過，洛迪有樣嘢冇人可以取代佢，就係上陣勝出率，據英國《每日郵報》報道，曼城有洛迪在陣，勝出率達74%，輸波率只係11%，反觀洛迪缺陣下，勝率跌到64%，而輸波率就增加至24%。呢位西班牙國腳長抖，大大削弱曼城爭標機會。