41歲哥迪奧巴禾請纓　願出山幫巴塞把關

巴塞隆拿門將達史特根上場聯賽嚴重受傷，面臨缺陣9個月，球隊急需要簽入1位門將填補空缺，剛退役1個月嘅前貝迪斯門將哥迪奧巴禾表示，願意復出為巴塞把守最後一關，唔知教練費歷克會唔會考慮簽入呢位41歲智利老將呢？

雖然轉會市場已關閉，但巴塞隆拿等球會仍然可以隨時簽入自由身球員，哥迪奧巴禾今夏離開貝迪斯，上月底宣布結束球員生涯，但佢眼見巴塞隆拿需要簽入門將，請纓回巢幫手，公開話：「如果巴塞隆拿需要我，就打電話畀我，我已經準備好，可以復出。」哥迪奧巴禾曾於2014至16年效力巴塞隆拿，其後轉投曼城，4年前加盟貝迪斯，所以佢非常熟悉巴塞隆拿。

哥迪奧巴禾效力巴塞隆拿期間，上陣75場失44球，有43次零封對手，協助巴塞捧過1次歐聯、1次世冠盃、2次西甲、2次西班牙盃等冠軍。值得一提，哥迪奧巴禾同達史特根當年做過隊友，巴禾主要踢聯賽，達史特根負責盃賽。

除咗哥迪奧巴禾之外，前皇馬門將基羅拿華斯、前紐卡素門將卡利奧斯，都係巴塞簽入目標。