曼聯又睇中阿特蘭大兵　今次想簽巴西防中

曼聯近年頻頻收購阿特蘭大球員，根據歐洲多間媒體爆料，紅魔鬼又準備向呢支意甲球隊埋手，計劃明年1月轉會市場重開後，出手收購阿特蘭大防守中場艾達臣荷西，取代同屬巴西國腳嘅卡斯米路。

曼聯今年夏天已經打算簽入艾達臣荷西，但未能成功，球隊開季後成績欠佳，促使會方計劃冬季再次增兵，艾達臣荷西仍然屬於主要收購目標，今次可能需要加碼至6,000萬歐元(約5.2億港元)轉會費，皆因呢位25歲中場硬漢非常搶手，巴塞隆拿、國際米蘭、紐卡素等豪門都有興趣簽佢。

艾達臣荷西上季為阿特蘭大各項賽事上陣53場入7球，踢法攻守兼備。除咗艾達臣荷西之外，拜仁慕尼黑中場哥列斯卡都係紅魔鬼收購目標之一。