大衞拉耶受傷　阿仙奴或用16歲門將踢英聯盃

阿仙奴門將大衞拉耶上場英超對曼城，勇戰受傷，可能缺陣周四(26日)凌晨英聯盃第3圈主場對保頓，由於副選門將尼圖唔符合參賽資格，另1位後備門將施福特有傷在身，因此，領隊阿迪達可能焗用年僅16歲「第4門將」積克樸達擔任正選把關。

大衞拉耶上場比賽途中，曾經受傷需要接受軍醫治療，雖然呢位29歲西班牙國腳最後踢足全場，但賽後離場時被發現右腳膝部包紮繃帶，並且行路一拐一拐，明顯受傷。考慮到今場英聯盃對手只係英甲球隊保頓，阿迪達好可能收起大衞拉耶，以免佢傷勢惡化。

由於阿仙奴副選門將尼圖曾於今屆英聯盃第2圈為般尼茅夫上陣，佢被外借去兵工廠後，唔可以再喺呢項賽事披甲，至於施福特有傷在身，狀態成疑，積克樸達成為阿迪達手上僅有嘅門將人選。

呢位新星早前歐聯對阿特蘭大，都有被列入大軍名單，可見阿迪達有心栽培佢，今場英聯盃正係積克樸達表演好機會。