皇馬挫艾拉維斯　麥巴比「5連發」後傷出

周三(25日)凌晨西甲，皇家馬德里主場3比2擊退艾拉維斯，法國前鋒基利安麥巴比全面上力，連續第5場為皇馬取得入球，不過佢喺比賽尾段受傷主動要求離場，下場「馬德里打吡」上陣成疑。

皇馬近期愈戰愈勇，今仗1分鐘就由盧卡斯華斯基斯閃電入波領先，開咧頭3輪食白果嘅麥巴比亦「恢復正常」，40分鐘同祖迪比寧咸撞牆後射入，連續第5場為皇馬入波。換邊後3分鐘洛迪高高斯再入1球，皇家領先3比0後以為輕鬆等收工，但艾拉維斯喺85分鐘同86分鐘突然連入2球，幸皇馬並冇自亂陣腳，最後保住3比2勝局。

麥巴比今場80分鐘被換走，據報佢覺得大腿肌肉不適而主動要求離場，教練安察洛堤賽後派定心丸：「麥巴比冇乜大問題，可能有啲疲倦，佢主動提出換人係唔想冒險。」據《Relevo》報道，麥巴比會為左腳大腿肌肉做測試，決定佢可唔可以喺周一(30日)凌晨作客馬德里體育會上陣。