巴塞斟施捷斯尼　羅拔佬：可以租我間屋

巴塞隆拿急需要簽入1位門將，頂替受重傷長抖嘅達史特根，繼剛退役1個月嘅前貝迪斯門將哥迪奧巴禾毛遂自薦後，盛傳巴塞隆拿有意簽入另一位早前掛靴嘅門將施捷斯尼，隊內射手羅拔利雲度夫斯基亦力邀呢位波蘭同胞加盟，更揚言可以租自己間屋畀佢。

由於轉會市場已關閉，巴塞隆拿只可以簽入自由身球員，根據西班牙《每日體育報》爆料，巴塞管理層認為施捷斯尼係最合適人選，因為佢只係34歲，門將來講仍屬於當打年齡，比近年長坐冷板嘅41歲門將哥迪奧巴禾，更符合球隊需要。

事實上，施捷斯尼過去6季都係祖雲達斯正選，上季意甲上陣35場失30球，有15場零封對手，佢1個月前宣布退休，令人大感意外，以施捷斯尼身體狀況，相信可以迅速操起狀態。

據悉羅拔利雲度夫斯基都幫手遊說施捷斯尼加盟，並願意將自己一間位於巴塞隆拿嘅冇人住豪宅，租畀呢位昔日國家隊隊友，巴塞上下盛意拳拳，可能真係可以打動施捷斯尼簽約。