膝傷嚴重　華拉尼宣布提早收山

法國球星華拉尼今夏離開曼聯，點知轉投意甲新貴科木第1場比賽就受傷，一直缺陣，呢位31歲球星周三(25日)正式宣布掛靴，結束14年職業球員生涯。

華拉尼上季喺曼聯表現下滑，夏天以自由身離隊，意外簽約科木兩年，可惜佢喺意盃首演就受傷，據報今次膝傷需要長時間休息，科木亦冇擺佢入今季意甲大軍名單，早前傳出科木計劃同佢解約。

華拉尼透過社交網公布掛靴決定：「我嘅球員生涯遇過好多挑戰，並一一刻服，回想過去歲月，實在百感交雜，亦覺得驕傲，依家係時候宣布退役，告別我最愛嘅足球比賽。」華拉尼透露會繼續留喺科木，一般估計可能擔任助教角色，協助主帥法比加斯。

華拉尼曾經效力朗斯、皇家馬德里同曼聯等球會，為皇馬拎過4次歐聯冠軍，又幫法國贏過2018年世界盃冠軍，曾被譽為世界最佳中堅。