愛華頓新班主計劃換帥　首選修夫基

美國富商佛烈金收購愛華頓大部分股權，成為新班主之後，準備推行改革拯救球隊，根據《talkSPORT》爆料，佛烈金第一件事係換帥，計劃解僱領隊戴治，並聘請前英格蘭國家隊主帥修夫基執教，希望護級成功。

愛華頓今季英超5戰只有1和4負，如果成績再冇改善，季尾好大機會降班，佛烈金認為戴治已經黔驢技窮，無法率領「拖肥糖」翻身，換帥事在必行。據悉佛烈金非常欣賞修夫基，加上佢辭去英格蘭國家隊領隊職位後，仍然未有教職，可以立即上任，符合急需換帥嘅愛華頓要求。

不過，修夫基教波生涯只曾於2006至09年擔任球會主帥，執教米杜士堡，其後成為英格蘭U21及大國腳領隊，佢教米堡3年搞到球隊由英超降班，能否拯救到愛華頓，實屬疑問。