勞基梳爾傷勢有麻煩　復出日子又延期

曼聯左後衞勞基梳爾近年經常受傷缺陣，佢自從7月歐國盃決賽之後，就一直養傷，今季仍未為紅魔鬼上陣。呢位29歲英格蘭國腳原本準備10月初復出，但領隊坦哈格最新透露，勞基梳爾起碼要等到10月19日晚英超主場對賓福特，先至有機會上陣。

勞基梳爾踢完歐國盃後，受到小腿傷患困擾，今季已經唔係第1次延期復出，曾有消息指佢可以喺9月14日晚英超上陣對修咸頓，結果唔見人，其後領隊坦哈格表示，勞基梳爾有望踢10月初歐霸盃對波圖，或者英超對阿士東維拉，但呢位荷蘭名帥現時又改口：「我唔可以肯定話你知，勞基梳爾幾時踢得，根據原本計劃係10月國際賽前，但現時可能要等到國際賽之後。」

曼聯喺10月國際賽之後第1場比賽，就係10月19日晚英超主場對賓福特，至於到時見唔見到勞基梳爾復出，大家拭目以待。