利物浦大炒韦斯咸　英联杯第4圈又抽下签

周四(26日)凌晨英联杯第3圈，势如破竹嘅利物浦主场5比1大炒韦斯咸，新兵费达历高基艾沙首次担正交出助攻，“红军”火力大晒冷！英联杯第4圈亦已抽签，利物浦又抽下签要作客白礼顿，而呢一圈最瞩目赛事，将会系热刺主场对曼城。

利物浦今场用副选作战，但对住颓爆嘅韦斯咸游刃有馀，就算21分钟有查洛尔昆沙摆乌龙先落后，4分钟后即由基艾沙助攻迪亚高祖达追平。换边后祖达再入1球反超前，穆罕默德沙拿74分钟射成3比1后，韦斯咸仲有艾臣奥马艾华利斯两黄一红被逐，结果兵败如山倒，利物浦前锋加普补时连入2球，凑成5比1大胜。

利物浦领队施洛赛后，向批评佢哋夏天“唔买人”嘅人大反击：“好搞笑，我过去2个月一直被问买人嘅问题，我又一直强调球队已经有好多高质球员，我谂你哋依家见到啦。我最开心嘅系，呢班球员得到机会后，唔会只系挂住展现自己，而系为球队而努力。”

第4圈抽签完成(见表)，利物浦又会遇上英超球队，今轮要作客白礼顿，施洛表示：“呢个对手好难搞，不过依家剩低嘅都系有实力嘅球队，而且要赢冠军嘅话，难免要对住劲旅，包括今场对手韦斯咸。”

英联杯第4圈抽签

热刺 对 曼城

曼联 对 李斯特城

白礼顿 对 利物浦

普雷斯顿 对 阿仙奴

宾福特 对 锡周三

修咸顿 对 史笃城

AFC温布顿/纽卡素 对 车路士

阿士东维拉 对 水晶宫