羅拔仔着火！巴塞西甲開咧7連勝

巴塞隆拿喺西甲勇不可擋！周四(26日)凌晨主場迎戰基達菲，憑羅拔利雲度夫斯基一箭定江山贏1比0，開季7戰全勝排榜首，德國教練費歷克名留青史，成為巴塞史上第3個前7場聯賽全勝教練。

巴塞今仗用恩拿斯奧彭拿代替重傷嘅達史特根把關，佢開波早段就救出險球，19分鐘巴塞進攻，祖利斯古迪右路傳中，羅拔利雲度夫斯基近門射入，呢球亦係「羅拔仔」今季7場聯賽第7球，喺射手榜領先。巴塞之後仲有唔少入波機會，雖然未能把握，但1比0戰果足夠佢哋保持今季西甲100%勝率。

費歷克係繼2013年馬天奴(開季8連勝)同2017年華爾維迪(開季7連勝)後，巴塞史上第3個領軍前7場聯賽全勝教練，費歷克表示：「我為球隊表現自豪，賽前有人提醒我，基達菲係支防守好堅固嘅球隊，有時我哋進攻速度唔夠快，不過我哋最終都入到1球，成功拎晒3分。」