家族傳承！雲邦美囝囝歐霸首演入2粒

周四(26日)凌晨歐霸盃賽事，荷甲球隊表現唔差，川迪作客1比1逼和曼聯外，阿爾克馬爾亦喺主場3比2擊退艾夫斯堡，其中20歲新星魯賓雲邦美首戰歐洲賽即「起孖」，延續爸爸雲邦美同外公雲馬維克嘅輝煌。

出任翼鋒嘅魯賓雲邦美2年前喺荷甲上位，上季轉投阿爾克馬爾拎到歐霸資格，今場首次喺歐洲舞台亮相即入2球，助球隊3比2反敗為勝，佢爸爸媽媽亦有入場睇呢場「家族傳承」嘅比賽。

魯賓雲邦美嘅爸爸係荷蘭名將，踢過107場歐洲賽事，更曾協助巴塞隆拿喺2006年贏歐聯冠軍；魯賓雲邦美外父係前荷蘭領隊雲馬維克，佢喺2002年亦帶領飛燕諾贏歐洲足協盃(歐霸盃前身)冠軍，依家就輪到魯賓雲邦美發威！