柏基達造波案燒到西甲　親戚過數貝迪斯前鋒

韋斯咸球星盧卡斯柏基達，今年5月被英格蘭足總起訴違反賭博條例，並且「局部操控比賽」，故意拎黃牌後喺博彩獲益。據報呢單案件近日燒到西甲，柏基達嘅叔叔同堂兄弟，被發現上年過數畀貝迪斯翼鋒路爾斯軒歷基，透過呢位巴西球員拎黃牌獲利。

巴西國腳柏基達被指喺2022年到2023年間，喺4場英超入面故意拎黃牌，博彩公司Betway發現有唔尋常投注揭發事件，原來Betway報告嘅可疑賽事唔止英超，西班牙足總同西甲賽會亦調查2場貝迪斯賽事，當中軒歷基都拎到黃牌，不過未有處分行動，而貝迪斯今個暑假已將軒歷基賣去保地花高。

據巴西媒體《UOL》報道，柏基達嘅叔叔同堂兄弟，喺今年1月同2月分別「過數」畀軒歷基，總數超過5,000歐元，而且時間係喺軒歷基拎黃牌後幾日，令事件更加可疑。柏基達叔叔接受《UOL》訪問，承認曾經過數畀軒歷基，並且曾經下注貝迪斯賽事贏錢，但就否認收到內幕貼士，解釋「過數」只係還番之前借過軒歷基嘅錢。