柏基达造波案烧到西甲　亲戚过数贝迪斯前锋

韦斯咸球星卢卡斯柏基达，今年5月被英格兰足总起诉违反赌博条例，并且“局部操控比赛”，故意拎黄牌后喺博彩获益。据报呢单案件近日烧到西甲，柏基达嘅叔叔同堂兄弟，被发现上年过数畀贝迪斯翼锋路尔斯轩历基，透过呢位巴西球员拎黄牌获利。

巴西国脚柏基达被指喺2022年到2023年间，喺4场英超入面故意拎黄牌，博彩公司Betway发现有唔寻常投注揭发事件，原来Betway报告嘅可疑赛事唔止英超，西班牙足总同西甲赛会亦调查2场贝迪斯赛事，当中轩历基都拎到黄牌，不过未有处分行动，而贝迪斯今个暑假已将轩历基卖去保地花高。

据巴西媒体《UOL》报道，柏基达嘅叔叔同堂兄弟，喺今年1月同2月分别“过数”畀轩历基，总数超过5,000欧元，而且时间系喺轩历基拎黄牌后几日，令事件更加可疑。柏基达叔叔接受《UOL》访问，承认曾经过数畀轩历基，并且曾经下注贝迪斯赛事赢钱，但就否认收到内幕贴士，解释“过数”只系还番之前借过轩历基嘅钱。