阿仙奴證實拉耶受傷　尼圖周末候命

季初狀態大勇嘅阿仙奴門將大衞拉耶，因大腿受傷缺席周四(26日)英聯盃，領隊阿迪達表示未知呢位西班牙國腳幾時復出，周六(28日)對李斯特城嘅英超上陣成疑。

阿仙奴上場聯賽作客曼城，拉耶喺比賽尾段受傷，雖然最後頂到完場，但賽後被影到一拐一拐咁離開。周四英聯盃對保頓一仗，喺2號龍門尼圖同3號龍門施福特同時缺陣下，拉耶亦未能「頂硬上」，阿仙奴要用16歲嘅積克樸達把關，令佢成為阿仙奴史上最年輕正選上陣球員。

阿達達證實拉耶受到大腿傷患困擾，賽後被問到可唔可以喺周末復出，阿迪達表示：「暫時仲未清楚。」好消息係，喺英聯盃唔合資格上陣嘅巴西門將尼圖，返到英超可以候命，如果拉耶未能復出，呢位35歲門將有望首次為阿仙奴披甲。