阿仙奴证实拉耶受伤　尼图周末候命

季初状态大勇嘅阿仙奴门将大卫拉耶，因大腿受伤缺席周四(26日)英联杯，领队阿迪达表示未知呢位西班牙国脚几时复出，周六(28日)对李斯特城嘅英超上阵成疑。

阿仙奴上场联赛作客曼城，拉耶喺比赛尾段受伤，虽然最后顶到完场，但赛后被影到一拐一拐咁离开。周四英联杯对保顿一仗，喺2号龙门尼图同3号龙门施福特同时缺阵下，拉耶亦未能“顶硬上”，阿仙奴要用16岁嘅积克朴达把关，令佢成为阿仙奴史上最年轻正选上阵球员。

阿达达证实拉耶受到大腿伤患困扰，赛后被问到可唔可以喺周末复出，阿迪达表示：“暂时仲未清楚。”好消息系，喺英联杯唔合资格上阵嘅巴西门将尼图，返到英超可以候命，如果拉耶未能复出，呢位35岁门将有望首次为阿仙奴披甲。