熱刺自製紅牌鬧劇　10人應戰照贏3比0

周五(27日)凌晨歐霸盃，英超勁旅熱刺主場迎戰卡拉巴克，雖然開波7分鐘就出現紅牌鬧劇，但大部份時間踢少個下仍憑蘇蘭基1射1傳大勝3比0，各項賽事連贏3仗，為周日(29日)英超作客曼聯打下強心針。

熱刺今場起用半隊後備，之前埋怨少上陣嘅羅馬尼亞中堅達古仙，難得擔正就出事，7分鐘喺後場控甩波被對手偷走，達古仙情急下又推又掹整跌對手，由於佢係防線最後1人，球證只能向佢出示紅牌。

早早踢少個嘅熱刺始終高班過對手，12分鐘蘇蘭基又喺前場反搶，交畀比蘭莊臣窄位抽入，52分鐘柏比沙亞再喺角球攻勢入波，卡拉巴克之後有12碼宴客，熱刺最終由蘇蘭基入多球埋齋，大勝3比0。

熱刺領隊普斯迪高路賽後表示：「開波踢得好差，不過紅牌之後嘅反應好好，一直咁做壓逼，展示出好高昂嘅戰意。蘇蘭基表現出色，喺各方面都好大貢獻，而且打破好漫長2場嘅入球荒添！」

熱刺自北倫敦打吡輸畀阿仙奴後，各項賽事已經連贏3場，比蘭莊臣連續3場入波狀態大勇，周日喺英超作客曼聯將充滿信心。