热刺自制红牌闹剧　10人应战照赢3比0

周五(27日)凌晨欧霸杯，英超劲旅热刺主场迎战卡拉巴克，虽然开波7分钟就出现红牌闹剧，但大部份时间踢少个下仍凭苏兰基1射1传大胜3比0，各项赛事连赢3仗，为周日(29日)英超作客曼联打下强心针。

热刺今场起用半队后备，之前埋怨少上阵嘅罗马尼亚中坚达古仙，难得担正就出事，7分钟喺后场控甩波被对手偷走，达古仙情急下又推又掹整跌对手，由于佢系防线最后1人，球证只能向佢出示红牌。

早早踢少个嘅热刺始终高班过对手，12分钟苏兰基又喺前场反抢，交畀比兰庄臣窄位抽入，52分钟柏比沙亚再喺角球攻势入波，卡拉巴克之后有12码宴客，热刺最终由苏兰基入多球埋斋，大胜3比0。

热刺领队普斯迪高路赛后表示：“开波踢得好差，不过红牌之后嘅反应好好，一直咁做压逼，展示出好高昂嘅战意。苏兰基表现出色，喺各方面都好大贡献，而且打破好漫长2场嘅入球荒添！”

热刺自北伦敦打吡输畀阿仙奴后，各项赛事已经连赢3场，比兰庄臣连续3场入波状态大勇，周日喺英超作客曼联将充满信心。