【有片】前曼聯組合聯手 麥湯開齋錫隊徽
2024年09月27日 10:00
東網電視
更多新聞短片
麥湯米尼攻入加盟拿玻里第1球。
今夏由曼聯轉投拿玻里嘅麥湯米尼，周五(27日)凌晨意盃32強成功開齋，佢喺前曼聯隊友盧卡古助攻下射入1球，協助拿玻里5比0大破巴勒莫。麥湯米尼入波後興奮狂錫波衫上嘅拿玻里隊徽，似乎已完全融入呢支意甲勁旅。
拿玻里今場贏得輕鬆，半場已經領先3比0，70分鐘再由大衞拿尼斯入多粒，干地尾段換入麥湯米尼、盧卡古同基華拉斯基利亞，估唔到麥湯米尼入場1分鐘就入波，接應盧卡古傳中近門射入，呢位蘇格蘭國腳隨即向住球迷親吻拿玻里隊徽，贏晒民心。
麥湯米尼日前表示要為拿玻里捧盃，仲大讚拿玻里球迷更勝曼聯球迷：「當知道拿玻里想簽我，我心入面嗰團火就燃起，拿玻里嘅球迷好瘋狂，係我見過最好嘅球迷，得到干地呢種級數教練賞識，令我對自己充滿信心。」