有火！佐敦軒達臣因一事　鬧爆隊友

周五(27日)凌晨歐霸盃，阿積士主場以4比0大勝比錫達斯，但比賽過程中，呢支荷甲勁旅發生內訌，隊長佐敦軒達臣不滿隊友貝特蘭查奧爾犯錯，發火鬧爆呢位翼鋒，更加幾乎開拖，幸好隊友介入勸交，先至平息事件。

當時阿積士已領先3球，貝特蘭查奧爾可能因而掉以輕心，喺後場大意失去控球權，幾乎造成失波，佐敦軒達臣立即衝前狂鬧呢位29歲布基納法索國腳，貝特蘭查奧爾亦作出反駁，其他隊友見狀，加入勸交分開2人。

貝特蘭查奧爾曾經效力車路士及阿士東維拉，令人懷疑佢同佐敦軒達臣可能有牙齒印，不過賽後軒達臣回應話：「其實有睇我踢波嘅人都知，呢種情況經常出現，十分平常，我哋都係想贏波，想作出改善，所以需要溝通，令每個人都保持警惕。」

34歲嘅佐敦軒達臣上年離開利物浦，轉投沙特阿拉伯球隊伊蒂法克，被指貪錢「養老」，準備等退休，但佢僅過半季，就重返歐洲加盟阿積士，加上今場訓斥隊友，可見佢仍然鬥心十足。