曼联CEO宣布“150计划”　英超冠军要等4年？

曼联自新老板拉特克利夫掌权后，全队上下都进行改组，据报由曼城挖角嘅新任行政总裁贝拉达，上星期召集曼联所有员工，宣布“150计划”嘅雄图大计，目标系喺曼联150周年会庆嗰阵赢英超冠军，有曼联球迷表示仲要等多4年！

据《The Athletic》报道，贝拉达上周三(18日)召集所有球会员工，讲解佢同拉特克利夫嘅发展大计，并命名为“150计划”，因为曼联喺1878年创立，2028年就系创会150周年，曼联目标系喺呢一年重夺英超冠军，包括曼联女足都要喺呢年赢英超冠军。

事实上，拉特克利夫上季亦有类似言论：“我哋盘算嘅唔系咩10年计划，因为球迷会失去耐性，肯定会有3年计划，但要曼联下季即刻踢到好似曼城咁系不切实际，我哋唔会畀错误嘅期望。”C朗拿度早前曾批评曼联唔应该公开承认“冇力争冠”，估唔到连CEO都咁早投降。

红魔球迷闻言反应一般：“仲要等4年”、“哪来的自信？”、“即是仲有4年时间霉！”，有敌对球迷更指“攞英冠易啲喎！唔使等4年。”