皇馬睇中曼聯鐵人　坦哈格有排煩

曼聯現時每場都正選上陣嘅球員，就係葡萄牙守將達洛治，呢位25歲鐵人上季上陣50場，今季簽入馬沙拉奧後，達洛治被迫改打左閘，但都能勝任，據報皇馬開始關注達洛治動向，一旦出手斟介，相信達洛治好難拒絕。

達洛治係今季曼聯唯一每場都正選嘅球員，佢現時客串左閘，不過如果勞基梳爾復出，達洛治就可能退居後備，到時如果皇馬出手挖角，曼聯將難以招架。

英國傳媒報道，皇馬第一目標係利物浦後衞阿歷山大阿諾特，不過利物浦在施洛接手後成績唔差，好可能吸引到阿諾特續約，如果阿諾特留隊，皇馬就會改標目標，全力斟介達洛治。

達洛治去年同曼聯續約5年，合約至2028年屆滿，不過佢人工偏低，周薪只得8.5萬鎊，一旦退居後備，達洛治就好可能離隊，而且達洛治從國家隊隊友C朗口中知道，加盟皇馬意味住足球生涯提升，到時曼聯隨時被迫放人。