車路士1億水貨勢離隊　馬賽有意接收

車路士去年初以超過1億歐元從阿仙奴手中搶嚟烏克蘭前鋒梅迪歷，表現貨不對辦，已被放入雪櫃，據報由於上陣機會渺茫，梅迪歷有意1月離隊，法甲馬賽有意接收。

梅迪歷加盟車路士就快2年，車路士同佢簽下8年半超長約，準備以佢為長期核心，但呢次投資明顯失敗咗，過去各項賽事上陣62場，僅交出7入球5助攻，依家車路士陣容人滿之患，梅迪歷被徹底放棄。

梅迪歷本人亦冇癮，打算離開車路士，據報馬賽有意收留梅迪歷，有部分原因係馬賽主帥迪薩比，效力薩克達期間曾經帶過梅迪歷，雙方有合作經驗；曼聯前鋒格連活特今季在馬賽大放異彩，如果梅迪歷過檔馬賽，話唔定有得翻生。