艾邦拉荷收到風　沙拿明夏必去沙特

利物浦王牌前鋒穆罕默德沙拿5場交出3球4助攻，仍然係球隊進攻核心，不過問題係佢明夏約滿，至今續約未有聲氣，令唔少紅軍迷憂慮，前英格蘭國腳艾邦拉荷突然爆料，表示沙拿明夏去硬沙特，仲話係來自內幕消息。

艾邦拉荷表示：「我知道沙拿一定離隊，我有內幕消息，佢會去沙特簽下一份破妃錄嘅合約，內幕人士仲話我知，沙拿嘅人工會超越C朗，成為沙特足球代言人，呢份係無法拒絕嘅合約。」

如果艾邦拉荷講嘅嘢係真，沙拿明年夏天離隊，即係話嚟緊唔會續約，沙拿準備為紅軍踢埋最後一年，但佢都好專業，場場搏盡唔hea踢，想喺利物浦最後一季贏啲嘢。

至於沙拿轉投沙特嘅合約，C朗係世界紀錄保持者，年薪2億歐元，周薪大約330萬鎊，沙拿現時在利物浦周薪係35萬鎊，如果沙拿人工將會超越C朗，佢周薪將會在330萬鎊之上，即係現時嘅9至10倍，到底係咪真，大家好快就知。