兩項數據顯示　般費係曼聯最大毒瘤

曼聯近2場分別於英超悶和水晶宮0比0，以及歐霸盃被川迪逼和1比1，紅魔鬼整體人腳實力都比呢2支對手強，但卻無法勝出，英國傳媒指隊長般奴費南迪斯係最大「戰犯」，因為呢位葡萄牙國腳上述2場比賽，失去控球權次數，都屬於全場球員之中最多。

根據統計，曼聯對水晶宮，般奴費南迪斯有34次失去控球權，至於對川迪，有19次失去控球權，正因為般費經常「斷纜」，嚴重窒礙球隊組織攻擊，所以紅魔鬼近2場僅入1球。

此外，般奴費南迪斯身為曼聯進攻核心，但今季各項賽事，為紅魔鬼上陣8場仍然冇波入，如果佢狀態持續低迷，恐怕曼聯難翻身。