夏蘭特今季首食白果　曼城被紐卡素逼和

周六（28日）英超頭場，賽前證實悍將洛迪卡斯簡迪因傷提早收咧嘅曼城，仲有射手艾寧夏蘭特今季聯賽首次食白果之下，作客被「喜鵲」紐卡素逼和1比1，連續2場聯賽失分。

紐卡素今場有箭頭阿歷山大伊沙克缺陣，改由安東尼哥頓擔任「假9」，曼城賽前收到壞消息，防中洛迪卡斯簡迪證實因傷提早收咧，對「藍月亮」打擊極大，另一中場奇雲迪布尼同樣倦勤，主帥哥迪奧拿讓基亞利殊打正選，與貝拿度施華、根度簡，支援之前5場聯賽場場有波入嘅射手艾寧夏蘭特。

上半場互有攻守，去到35分鐘，基亞利殊於左路妙傳「帶刀侍衞」加華度爾窄位射入，先開紀錄，之後根度簡乘對方門將尼克普比交失波笠射，可惜唔夠力畀普比沒收。易邊後紐卡素加強攻力，58分鐘哥頓單刀畀曼城門神艾達臣摩拉斯掃跌，博到12碼，呢位英格蘭國腳親身操刀扳平，各一言和。