賓福特連續3場60秒內入波　結局好慘情

童話式嘅開局、悲劇嘅結尾，成為賓福特近期比賽嘅劇本，佢哋周六(28日)英超再一次喺開波60秒之內領先，連續3場喺頭1分鐘入波創造英超紀錄，不過賓福特呢3場比賽最終只得1和2負，有頭威冇尾陣。

賓福特對上2場聯賽作客曼城同熱刺，分別喺1分鐘內就由尤尼韋沙同麥比奧莫入波領先，但對曼城就反輸1比2，對熱刺又輸番1比3。周六主場迎戰韋斯咸，麥比奧莫再次喺37秒建功，但賓福特最終喺下半場被湯馬士蘇錫克攻陷，只能同韋斯咸打和1比1。

賓福特領隊法蘭克賽後表示：「呢個只係英超紀錄？我要知道呢個係咪世界紀錄！我哋當然有計劃咁做，我哋想一開波就有正面態度，直接喺對手面前進攻，當然要有天時地利嘅配合，但我要讚揚球員同教練團嘅鋪排。」賓福特下場會主場對狼隊，真係要睇實佢哋開波戰術。