謝德謙：曼聯要反省　熱刺有雞偷

曼聯主場大戰熱刺，兩軍聯賽目前排喺中游位置，熱刺暫排第10，而曼聯則落後1位，兩軍為咗追趕前列位置，相信今場絕不留手務求全取3分。

曼聯雖然近4場不敗，主帥坦哈格早前表示，球隊包括佢自己在內需要自我反省，今場面對熱刺相信都會叫一眾「紅魔」打醒十二分精神。曼聯近期征戰頻頻，球員體力消耗大，今場即使有心都未必有力。

另外，坦帥仲要增強球隊埋門把握力，射手約舒亞舒克斯已經多場食白果，加上拉舒福特狀態仍然低沉，今場要攻破熱刺大門並不容易。

熱刺雖然同樣三線作戰，但先後喺聯賽、英聯盃及歐霸取得三連勝，周中喺打少1人嘅情況下，以3比0擊敗卡拉巴克，領隊普斯迪高路即使打少一人仍然保持主攻踢法。今場大戰「紅魔」相信繼續大打進攻足球，特別係新兵蘇蘭基繼續狀態大勇，已經連續兩場取得入球。

熱刺今場作客曼聯相信入球機會未必多，以雙方近况去比較，估計中場爭奪形勢居多，大有機會熱刺控制較多局面，以近况去比較熱刺或者有可能偷雞而回。