【有片】美斯入靚波都冇用 國際邁亞密連續3場失分
2024年09月29日 16:02
東網電視
更多新聞短片
美斯(右)今場射入1球。
去片睇美斯射入靚波
周日(29日)早上美職，球星如雲嘅國際邁亞密主場出擊，卻陷入苦戰，全靠球王美斯射入靚波，勉強以1比1逼和夏洛特FC，連續3場聯賽和波失分。
國際邁亞密上半場創造唔少攻勢，2位球星美斯、蘇亞雷斯分別錯過1次入波黃金機會，換邊之後更加先失守，夏洛特FC前鋒布朗尼高勁射，省中隊友施域達斯基，改變方向入網。
國際邁亞密隨即傾力反擊，美斯個人表演，推過對手後，喺禁區頂勁射入網扳平1比1，亦係呢位37歲阿根廷國腳今季聯賽第15個入波。
比賽後段，夏洛特FC曾經再次入波，但因為越位被判無效，國際邁亞密可以執番1分，都算好彩。雖然國際邁亞密連續3場失分，但仍然排東岸榜首。