接棒舒米高！靴文臣13次撲救創英超紀錄

李斯特城周六(28日)英超作客2比4輸畀阿仙奴，丹麥門將靴文臣雖然失咗4球，但佢全場表現神勇作出13次撲救，創下英超近7年單場最多撲救紀錄。呢位24歲門將用表現證明，有力成為卡斯柏舒米高接班人。

阿仙奴去到補時先連入2球贏李斯特城，但「兵工廠」今場共有34次攻門，若非靴文臣連環神救，「狐狸」早就輸得大大鑊。統計顯示，靴文臣今場13次撲救，係自2017年曼聯門將迪基亞(對阿仙奴14次撲救)後，英超單場最多撲救紀錄。

李斯特城領隊谷巴賽後表示：「我哋戥靴文臣開心，佢係好有才華嘅年輕門將，向住正確方向前進，第3個反彈失球好唔抵，呢個失球對佢同所有隊友都係冇運。」靴文臣喺丹麥國家隊，擔任前李斯特城門將卡斯柏舒米高副手，大部份人都睇好佢可以接棒舒米高，靴文臣早前曾表示：「所有丹麥門將都仰慕卡斯柏舒米高，佢喺李斯特城同國家隊都有輝煌成就，我唔會拎自己同佢比較，我只想盡量踢好每星期嘅比賽。」