接棒舒米高！靴文臣13次扑救创英超纪录

李斯特城周六(28日)英超作客2比4输畀阿仙奴，丹麦门将靴文臣虽然失咗4球，但佢全场表现神勇作出13次扑救，创下英超近7年单场最多扑救纪录。呢位24岁门将用表现证明，有力成为卡斯柏舒米高接班人。

阿仙奴去到补时先连入2球赢李斯特城，但“兵工厂”今场共有34次攻门，若非靴文臣连环神救，“狐狸”早就输得大大镬。统计显示，靴文臣今场13次扑救，系自2017年曼联门将迪基亚(对阿仙奴14次扑救)后，英超单场最多扑救纪录。

李斯特城领队谷巴赛后表示：“我哋戥靴文臣开心，佢系好有才华嘅年轻门将，向住正确方向前进，第3个反弹失球好唔抵，呢个失球对佢同所有队友都系冇运。”靴文臣喺丹麦国家队，担任前李斯特城门将卡斯柏舒米高副手，大部份人都睇好佢可以接棒舒米高，靴文臣早前曾表示：“所有丹麦门将都仰慕卡斯柏舒米高，佢喺李斯特城同国家队都有辉煌成就，我唔会拎自己同佢比较，我只想尽量踢好每星期嘅比赛。”