仲未落班　34歲巴洛迪利可能掛靴

34歲前意大利國腳巴洛迪利今夏離開土耳其球隊代米爾，再度回復自由身，佢一直希望重返意大利，但冇球隊收留，據報如果落班失敗，「巴神」可能掛靴。

巴洛迪利一直希望重返頂級聯賽，最想返意大利落班，傳得最勁係去意乙巴勒莫，不過早前意大利盃對拿玻里賽前，巴勒莫高層已經公開回應唔會簽佢：「我哋同巴洛迪利嘅傳聞只係傳媒炒作，我哋已經有兩位前鋒。」

重返意大利希望落空，現時仍然有球隊想簽佢，不過並非5大聯賽球隊，而係保加利亞班霸索菲亞中央陸軍，據報巴洛迪利現時有兩個選擇，一係去保加利亞，一係掛靴。