如果聖誕前曼聯排10名外　坦哈格落鑊

曼聯今夏大灑金錢擴軍，但成績仍然低落，領隊坦哈格壓力沉重，是否換帥將在聖誕前拍板，據報如果聖誕前曼聯仍然排10名以外，坦哈格就會被炒。

英國傳媒報道，雖然坦哈格強調自己1年贏1個盃賽冠軍，但聯賽成績太差又係不爭事實，令佢下台壓力愈嚟愈大，最大鑊係有其他人同佢比較，報道指，同樣來自荷甲嘅利物浦新帥施洛，帶領紅軍完勝坦哈格，球隊現時更位居榜首。

近兩季同曼聯難兄難弟嘅車路士，變化就更加明顯，起用新帥馬利斯卡之後球隊隨即大變身，只用咗9場就令球隊脫胎換骨，相比起坦哈格經常強調重建需要時間，簡直係打面打到啪啪聲。

報道指，曼聯高層將換帥線定於聖誕前，如果排名仍在10名外就會換帥，希望在新帥帶領下挽救球季，不過咁就亦好公道，排名前10門檻甚低，如果坦哈格咁都做唔到，亦都抵炒。