般奴費南迪斯為紅牌喊冤：麥迪臣都撐我！

曼聯喺英超主場吞熱刺3蛋，上半場被逐嘅般奴費南迪斯毫無疑問係罪人，呢位葡萄牙球星賽後公開喊冤，直指球證出示紅牌係錯判，更指連被踢嘅占士麥迪臣，都同意佢唔應該被趕出場。

般奴費南迪斯為曼聯上陣242場比賽，首次拎紅牌被逐，不過當時佢出腳攔截前明顯跣腳，而且並冇踩中占士麥迪臣，紅牌似乎過嚴。般奴費南迪斯將停賽3場，缺席對維拉、賓福特同韋斯咸嘅聯賽。

呢位曼聯隊長賽後表示：「冇人想被趕出場，感覺好差，球隊之後再失多2球。我冇用鞋釘去鏟波，呢腳係明顯犯規，但絕對唔係紅牌，麥迪臣都同意(唔係紅牌)，如果咁都紅牌，好多其他例子都要重新去睇。球證出黃牌我會接受，但呢腳永遠冇可能係紅牌，唔明點解VAR唔叫球證去睇多次。」