拿玻里贏波登榜首　意甲6輪出6隊「1哥」

意甲近年競爭激烈，對上5季出過4支冠軍球隊，今季賽事依舊「百花齊放」，拿玻里喺周一(30日)凌晨主場2比0贏蒙沙後，力壓祖雲達斯登上榜首位置，亦係意甲頭6輪賽事入面第6支每周「1哥」。

意甲開咧之後，每輪賽事後都更換榜首，阿特蘭大(第1輪)、祖雲達斯(第2輪)、國際米蘭(第3輪)、烏甸尼斯(第4輪)、拖連奴(第5輪)先後坐過「1哥」位置，今輪完結後就由拿玻里上位，係意甲史上首次。

拿玻里今仗由保列坦奴先開紀錄，之後麥湯米尼助攻基華拉斯基利亞入波，助拿玻里輕鬆贏2比0。教練干地賽後表示：「我哋季初賽程唔算太難，球員可以累積經驗去應付之後更難嘅賽事，我見到佢哋有強烈嘅進步願望，呢一點比起排榜首更令我欣慰。」